Hetta er minkurin, sum varð skotin í Tórshavn 01.10.2011. Sum tit síggja, so varð høvdið næstan kvett av, so skjúttararnir hava verið dugnaligir. Útstapparin hevur verið ikki minni dugnaligur, tí hetta varð eitt stórarbeiði hjá honum. Tøkutennirnar á minkinum eru brotnar, so vit ivast í, um hetta ikki mann verða ein minkur, sum er sloppin úr fangilsi. Myndirnar eru sendar til ein serfrøðing, og nú bíða vit bert eftir hansara svari.

Minkur finst ikki upprunaliga í føroysku náttúruni, so vit mugu vóna, at hesin er eitt eindømi, og at betur verður ansað eftir, tá flutningur kemur til landið!

Tann 18. april 2011 fann Siggert Patursson eina dvørgflogmús Pipistrellus pygmaeus (55 KhZ ) í Tórshavn.

Dvørgflogmús Pipistrellus pygmaeus er bert funnin eina ferð áður í Føroyum, og tað var í Sandoy í november 1993.

12. september 2010 sá Trygvi Midjord eina flogmús á grannahúsinum hjá sær í Hvalba. Rúni Thomsen tók síðani myndir av flogmúsini og fangaði hana.
Flogmúsin var send til Nólsoyar, har Jens-Kjeld Jensen staðfesti hana at verða av slagnum hýggiflogmús Vespertilio murinus.
Flogmýs eru sæddar í Føroyum umleið 50 ferðir; men hýggiflogmús er bert skrásett 2 ferðir áður við vissu – 1 í Sandavági í 1988 og 1 í Hvalba í 1994.
Hendan sama dagin - 12. september 2010 – fangaði Virgar Kjærbo eina trøllflogmús Pipistrellus nathusii í Víkarbyrgi. Sjá myndirnar her undir.

14. september 2010: Vit hava helst eina flogmúsainnrás í løtuni, tí Hjørdis Hávarsá sigur, at í minsta lagið 3-4 flúgva runt í Norðoyri. Somuleiðis flúgva í minsta lagið 4 flogmýs runt her í Nólsoy.

14. oktober 2010 hava higartil 20 persónar fráboðað í minsta lagið 30 ymiskar flogmýs, sum eru sæddar í Føroyum í ár.

Í løtuni kannar Eleanor sambandi millum mýsnar úr m. a. Orkney oyggjunum og tær úr Føroyum, Íslandi, Grønlandi og New Foundlandi. Spennandi verður at síggja úrslitið av hesum kanningum.

Týsdagin 15. september 2008 vórðu nólsoyingar varugir við í minsta lagið 2 flogmýs, ið flugu runt í bygdini. Góð ráð vóru dýr, men so hitti Jens-Kjeld upp á at býta netið út á síni fleygastong við eitt annað, ið hevði smærri meskur, og dagin eftir eydnaðist tað tí garvaða fleygamanninum René Hansen at fleygað aðra av flogmýsnum. Neyðugt var at fara fram við størsta varsemi, tí flogmýs kunnu vera fongdar við hundagalskapi (rabies).

Tann fyrsta trøllflogmúsin var skrásett í Føroyum í 1987, og síðan tá er hon fráboðað við vissu 7 ferðir, so trøllflogmús er vanligasta flogmúsin, ið vitjar her á landi.

Orsøkin til at tær koma til Føroyar er helst, at tær fara av kósini, tá tær ferðast millum lond. Og tær kunnu flúgva langa leið, tí longsti teinurin ein merkt trøllflogmús hevur flogið, var so langt sum 1600 km.

Her kanst tú lesa alt um haruveiðu í Nólsoy

Loðskinnið á láturkópi hevur eitt ríkt litspæl. Brimlarnir eru myrkir ella svartir við skiftandi fjøld av døkkum og hvítum blettum - einamest um bringu og búk. Opnurnar eru gráar ella silvurlittar á bakinum við ljóslittari bringu og skiftandi fjøld av dimmum plettum. Ungkópur hevur ljóst og meira sprøklut loðskinn, ið stundum eisini er brúnligt. Ungkópur hevur ofta slitnan hárleysan feld undir búkinum. Miðlingakópur er nakað myrkari. Kópur, sum hevur ligið á landi og er vorðin turrur, verður ljósari á liti - stundum næstan hvítur.
Myndirnar niðanfyri vísa býtið í kópastovninum: mest av ungum kópi í ymsum aldrum, nakrir fáir brimlar og so uml. 20-25% opnur.