Fuglar visit.

SJÁLDSAMIR FUGLAR Á VITJAN

Klikka á myndina og síggj hana í fullari stødd. Myndatekstur sæst við at peika á myndina við músini

Hattarmási Chroicocephalus philadelphia (Larus philadelphia)

Hattarmási er bert sæddur eina ferð í Føroyum, hesin var avmyndaður í januar 2012

Lítil valmási Larus glaucoides doyr í hungri

Lítil valmási Larus glaucoides verpur í Grønlandi og nakað longur í ein vestan verpur kumliensmási Larus glaucoides kumlieni, sum er eitt undirslag av lítlum valmása.
Vit høvdu eina rættiliga innrás av lítlum valmása mánaðarskiftið januar/februar 1983 og ikki fyrr enn nú, fyrst í januar 2012, kom ein nýggj innrás. Lítlu valmásarnir eru alla staðni, og eg havi tosað við fleiri fiskarar sum siga, at einir 30-40 fuglar eru kring teirra bát alla tíðina.
Í Føroyum er vanligt at eta litlan valmása og valmása Larus hyperboreus, og tí havi eg havt møguleika at kanna nakrar av teimum lítlu valmásunum. Allir uttan ein vóru diddarak og um at doyggja í hungri.
Lítil valmási sæst í Føroyum á vetri og kanningar vísa, at vanliga eru 96% av teimum honir. Kynsbýtið í hesi innrásini er 80% hannar og 20% honir – og tað er nakað, eg aldri havi sæð áður. Eg ivist ikki í, at tær minnu honinar ofta eru við undirlutan, tá talan er um at kappast um føðina og at tær tí fara longur burtur at leita eftir føði, har kappingin ikki er so hørð. Tá nú hannanir eru komnir til Føroyar í so stórum tali, bendir alt á, at einki sum helst er at eta í Grønlandi. Teir eru bart sagt flýddir undan hungursdeyðanum; spurningurin er so, um teir hava nakran sum helst møguleika at lívbjarga sær her heima, havandi í huga, at fuglurin hevur svøltað tey mongu seinastu árini.
Ein tann størsti munurin á hesi innrásini og henni í 1983 er, at hesu ferð eru bert heilt fáir lítlir valmásar, ið líkjast tí vestara undirslagnum kumliensmása Larus glaucoides kumlieni; men teir másarnir koma kanska seinni. Kumliensmási er sera fjølbroyttur í útsjónd og stórur munur er á ymisku búnunum; men sum heild er ungfuglurin døkkur, meðan tann gamli fuglurin hevur myrkar tekningar á ytru flogfjaðrunum.

Dagføring 08.01.2012

08.01.2012 lá hesin lítli valmásin á kaini í Nólsoy, ov ússaligur at fara á flog. Hann orkaði bert at standa eina lítla løtu, áðrenn beinini smokkaðu undan honum. Hetta er ein hannur, sum vigar 575 g. Ein vanligur hannur í hesi støddini skuldi vigað í minsta lagið 300 g. meira.

Legg til merkis høvuðlúsina av slagnum Saemundssonia (Saemundssonia) lari (O. Fabricius, 1780)

Dagføring 11.01.2012

11. januar 2012 lógu 38 lítlir valmásar í briminum í Hálgutoft - beint sunnan fyri Klivar - og ótu reyðæti. Ein gamal hannur lá deyður uppi á landi, hann vigaði 489 g. Eingin nólsoyingur hevur nakrantíð fyrr sæð so nógvar lítlar valmásar í einum.

Kumliensmási Larus glaucoides kumlieni

Hesin gamli steggin var í Nólsoy 12.01.2012

Les greinina hjá DOF "Grønlandsk kulde sender arktiske måger til Danmark"

Dimmur velreyði Phoenicurus ochruros

Hesin dimmi velreyðin er tann tíggjundi, ið er sæddur í Føroyum og tann fyrsti, ið nakrantíð er ringmerktur her á landi.

Roðaígða Carpodacus erythrinus

29.08.2011 ringmerkti eg 3 ungar roðaígður í Nólsoy. Tær vórðu fangaðar í helgolandsrúsuni.

Tadorna cana

12. mai 2011 vitjaði hendan Tadorna cana dunnan í Tórshavn. Hon stavar upprunaliga úr Suðurafrika, so hendan er helst ein, ið er rýmd úr fangilsi úr onkrum av grannalondum okkara.

Fyri fyrstu ferð hevur blátíta Cyanistes caeruleus verið í Føroyum allan veturin 2010/2011

06.12.2010 varð blátíta Cyanistes caeruleus skrásett fyri fyrstu ferð í Føroyum. Eg rokni við, at blátítan er komin til Føroyar saman við teimum 4 stórtítunum í oktober. Hetta er sostatt fyrstu ferð, at blátíta hevur livað allan veturin í Føroyum.

Fyri fyrstu ferð hevur stórtíta Parus major verið í Føroyum allan veturin 2010/2011

Fyri fyrstu ferð nakrantíð hava 4 stórtítur yvirliva veturin í Føroyum. Tað eydnaðist mær at ringmerkja eina av teimum.

Stórtíta Parus major

Fleiri stórtítir eru sæddar í Føroyum í oktober mánað í 2010, og hendan avmyndaða er ein av teimum.

Fyrstu ferð, stórtíta varð fráboðað í Føroyum, varð 02. mai 2003, tá 2 vórðu fangaðar í helgolandsfelluni í Nólsoy. Seinni vísti tað seg, at tær báðar vóru komnar við skipi til Føroyar, og at tann eina varð ringmerkt nær Holbæk í Danmark.

DK Rosenfinke Carpodacus roseus

Hendan finkan var fangað í Nólsoy 28.04.2003. Allahelst er hon sloppin úr einum búri og hevur so flogið til Føroyar. Hetta er fyrstu ferð, at DK rosenfinke er skrásett í Føroyum.

Fiskiørn Pandion haliaetus

12.09.2010 kom skipið Viking Lady inn á Runavík við einari ungari fiskiørn omborð. Hetta vísti seg at verða ein ungi frá í summar. Fiskaørnin kom í pleygu hjá Hans Eli Sivertsen á Argjum, har hon millum annað var gødd við makreli.

Jens-Kjeld Jensen ringmerkti ørnina 25.09.2010, og síðani var hon slept leys.

Æða Somateria mollissima faeroeensis

Á hvørjum ári síggjast fremmandar æður í Føroyum. Sum sæst á myndini, víkja tær ofta frá teimum føroysku í stødd, liti og ofta eisini sniðnum av høvdinum. Føroysku æðurnar eru búfastar og av undirslagnum Somateria mollissima faeroeensis, som telur um 7000 pør.

Dvørgspurvur Emberiza pusilla

Tann fyrsti dvørgspurvurin í Føroyum var skrásettur í mars 2010, tá eg fekk henda avmyndaða steggjan sendan til útstapning. Síðani hetta er fyrsta skrásetanin av dvørgspurvi í Føroyum, verða nærri kanningar gjørdar viðvíkjandi umstøðunum, har hann var funnin.

Dagføring: Mær er sagt frá, at dvørgspurvurin lendi á einum fiskibáti umleið 10 míl eystan úr Fugloynni seint á sumri 2006. Tá var hann heilt útlúgvaður.

Rókur Corvus monedula

Rókur er ikki vanligur gestur her á landi. Sambært Eiler Einarsson, Rituvík, vórðu 9 rókar í Rituvík 07.11.2009 og dagin eftir – 08.11.2009 - vórðu 2 í Nólsoy. Síðani tá hava 11 rókar verið í Havn, so møguliga verða teir verandi, nú teir longu hava búleikast her í 5 mánaðir.
Tann 22.03.2010 vórðu 6 rókar at síggja við SMS, og tá eydnaðist tað mær at taka hesar myndirnar av teimum.

Dagføring: Nú vit skriva 31. mai 2010, eru ongir rókar at síggja, allir eru farnir avstað aftur.

Tjaldursgrælingur Arenaria interpres

Tjaldurgrælingur hevur vetrarvist á sama stað, ár undan ári. Guy Morrison ringmerkti hendan gamli steggjan 1. juni 2008 í bygdini Alert á Ellesmere Island í Norðurcanada (82.30N - 62.20W). Hans Eli Sivertsen, Argir, sá tjaldursgrælingin fyrstu ferð tann 28. mars 2009 við Bacalao í Tórshavn. Í vetur sá HES hann aftur á sama stað. 1. februar 2010 tók Jens-Kjeld so hesar myndirnar av fuglinum.

Vongblikut krossnev Loxia leucoptera

Vongblikut krossnev er sjáldsamur gestur her á landi. Tað er skrásett 7 ferðirnar síðan 11. august 1898. Hesin áttandi gesturin, áður ein prúður ungur steggi - nú útstappaður, var funnin deyður í Suðuroy á sumri 2008.

Øsgulur ríðispurvur Embrezia hortulana

Hesa myndina tók Esbern í Eyðansstovu í Mykinesi 24. oktober 2009. Fuglurin var eisini at síggja í Mykinesi dagin eftir.

Øsgulur riðispurvur / Embrezia hortulana

Øsgulur riðispurvur er funnin áður í Føroyum: Í 1926 var ein steggi funnin í Nólsoy.

Í døgunum 3. -5. november 1945 var ein steggi aftur sæddur í Nólsoy.

2. mai 1947 var enn ein steggi sæddur í Nólsoy.

Velbláur Tarsiger cyanurus

Hesin "velblái" gesturin Tarsiger cyanurus var fangaður í Helgolandsrúsuni í Nólsoy 06.10.2009. Hetta er fyrstu ferð, at ein "velbláur" er sæddur í Føroyum, og helst kemur hann heilt úr Ruslandi.

Krossnev Loxia curvirostra

28. juni 2009 sá Turið Vestergaard 6-8 krossnev í Trangisvági, Suðuroy, og síðani tá eru fráboðanir komnar inn um krossnev um alt landið.

Krossnevini koma higar úr øllum Skandinavia vegna føðitrot í heimlandinum. Tey liva mest av fræ av grannkonglum, og finnast hesi ikki heima, leita tey út um landoddarnar í vón um betri.

Higartil eru fleiri krossnev funnin deyð. Avmyndaða gula bøgan var fangað av eini kettu úti í Nólsoy í dag tann 02. juli 2009. Í dag fangaði Agneta Jacobsen somuleiðis 3 krossnev í barnagarðinum í Nólsoy, og eitt av teimum er avmyndaði reyði steggin omanfyri.

Snjóugla Bubo scandiaca (Nyctea scandiaca)

Símun Petersen varð so heppin at avmyndað hesa snjóugluna 27. apríl 2009 í Gilinum á Høgaryggi, ið liggur millum Múlahaga og Krossdal á Borðoynni. Hetta er fjórða prógvaða fráboðanin síðan 1955, hinar tríggjar eru:
Oktober 1990, Hvannasund, Viðoy: Bøga funnin deyð av Oskar Simonsen og Poul Johannes Simonsen.
30. juli 2001: Ein sædd norðan úr Saksun, Streymoy av Kirstin Blom, Bette Johansen og øðrum, myndaprógv.
11. september 2004: Trongisvágur, Suðuroy: Gamal hannur sæddur av Jens Petur Brattalíð. Mynd: Bjarni Nygaard.
Fleiri aðrar snjóuglur eru ikki beinleiðis skrásettar; men ein Torvald skjeyt eina í Porkeri í umleið 1955. Umleið 1969 varð ein sædd nær Sumba. Ein hannur varð skotin í Nólsoy umleið 1970 (varð útstappaður). Fleiri nólsoyingar sóu eina flúgva inn yvir vágna í Nólsoy, tá Ritan legði at umleið í 1978. Ein varð líka við at verða yvirkoyrd, tá hon eina vetrarnátt umleið 1975 sat mitt á vegnum millum Tjørnuvík og Langasand, og at enda varð ein sædd 27. november 2004 á Kirkjubønesi av monnum, ið vórðu á haruveiðu.

Einki beinleiðis mynstur er at síggja í vitjanunum av snjóuglum í Føroyum og fráboðaninar eru heldur ikki skrásettar nágreiniliga.
Salomonsen (1963) skrivar um tilsamans fimtan, umframt at ein rættiliga innrás varð í 1955.
Müller sýslumaður (1863) skrivar hin vegin um eina snjóuglu frá umleið 1843 og so eina, sum hevði vetrarvist her í 1849-50. Hann nevnir eina, sum varð fangað í 1855, umframt at hann sama ár hoyrdi um fleiri kring landið.
Nú kann mann so ivast í, um Salomonsen er farin 100 ár av kós, tá hann hugsaði um innrásina í 1855 og so hevur skrivað 1955 í staðin?
Í oktober 1857 vórðu tvær snjóuglur sæddar nær Tórshavn, og ein varð sædd á sama stað 25. maj 1861.
Andersen (1901) skrivar, at Müller skjeyt ein gamlan hann nær Tórshavn 14. september 1863. Andersen (1897) skrivar eftir Petur á Botni: Nyctea nivea: Er fleiri ferðir sædd í Nólsoy umframt at ein er skotin har úti.
Salomonsen (1935): Ein bøga í Norðadali, Streymoy 18. juni 1897 og ein í Mykinesi 10. februar 1900.

Kinnhvítur ljómari Sylvia cantillans

Hesin kinnhvíti ljómarin - ein bøga - varð ringmerkt í Nólsoy 21. mai 2009. Hetta er aðru ferð, at kinnhvítur ljómari er funnin í Føroyum. Tann fyrsti steggin varð sæddur fríggjadagin 15. mai 2009 í Mykinesi, og har avmyndaði Hans Eli Sivertsen hann.

Síðan 8. mai 2009 eru hesi nýggju fuglasløgini sædd í Føroyum: Aythya affinis, Hirundo daurica, Milvus migrans, Milvus milvus og Sylvia cantillans. Enn eru tey ikki góðkend av SU (Sjældenhedsudvalget DK).

"Kúhegri" Ardeola ibis

Tummas Thomasen sá hendan kúhegran - sum er Føroya fyrsti - inni í Dalinum 28. september 2008. Tummas fortaldi Olevinus Sørensen, Viðareiði um hegran, og um døgverðatíð dagin eftir, sá hann eisini hegran á sama stað. Um kvøldið fleyg hegrin til Viðareiðis, og har sóu Tóri Simonsen og fleiri onnur hann. 30. september eydnaðist tað Tóra Simonsen at taka hesar báðar myndirnar.

Eftir at Jens-Kjeld Jensen legði fráboðanina út á FaroeNature, hava fleiri onnur fuglaáhugaði verið á staðnum og sæð sjáldsama gestin.

DK Mellemskarv Phalacrocorax carbo simensis

25. mars 08 sá Karl Thomsen ein (DK) mellemskarv standa á Drotningarsteini í Skálafirðinum, og 29. mars eydnaðist tað Hans Eli Sivertsen at taka hesa frálíku myndina av honum.
Hetta er fyrstu ferð, at hetta undirslagið av mellemskarv er sætt í Føroyum.

Smyril Falco columbarius á vitjan sep. 2007

Føroyski og íslendski smyrilin eitur F. c. subaesalon á látíni. Hann er bæði størri og døkkari á liti enn hini smyrlasløgini.

Í Føroyum verpa umleið 25 pør; men vit hava javnan vitjan av teimum íslendsku smyrlunum, tá teir ferðast framvið okkum á vári og heysti.

Ung smyrlabøga



Listi yvir sjáldsamar fuglar, sæddir í Føroyum í 2005 og 2006

Listi yvir allar sjáldsamar fuglar, sæddir í Føroyum til mai 2003

Sjáldsom hvítoygd ont sædd í Sandágerði, Tórshavn
Tann 11. maj 2005 sá Hans Eli Sivertsen eina hvítoygda antarbøgu í Sandágerði í Tórshavn, og nú vit nærkast endanum av mai, er hon her enn. Hetta er fyrsta fráboðanin um hvítoygda ont í Føroyum.